ომარ ლალიანცი 1976 წლიდან თენგიზ ბურჯანაძის სახელობის სტადიონზე მხაზველად მუშაობს. ადამიანს, რომელსაც თითოული მატჩის წინ მინდვრის მოწესრიგება ევალება, წელს სადიონზე მუშაობის 45 წელი შეუსრულდა.
ომარ ლალიანცი 1953 წელს დაიბადა, გვიყვება, რომ სავალდებულო სამხედრო სამსახურის დასრულებისა და დაოჯახების შემდეგ, მეგობარი დასაქმებაში დაეხმარა და ასე შემორჩა 45 წელი „დილას“ სტადიონის მხაზველად.
“იმ წლებში, როცა მე სტადიონზე სამუშაოდ მოვედი, გორში ისეთი ფეხბურთელები თამაშობდნენ, რომლებიც დღესაც ახსოვს გულშემატკივარს და დარწმუნებული ვარ, არც დაივიწყებს – თენგიზ ბურჯანაძე, ომარ ჭუჭყიანი, რევაზიშვილი, ნასყიდაშვილი, ხოხობაშვილი, ხორგუაშვილი, შუმახერა… იმ დროში, ადგილობრივ გუნდში სულ გორელი სპორტსმენები თამაშობდნენ, ახლა ცოტა სხვა რეალობაა, ბევრია ჩამოყვანილი ფეხბურთელი, უცხოელებიც, მათთან ურთიერთობა ენის ბარიერის გამო მიჭირს, თუმცა, გუნდი ერთი ოჯახია და ამდენი წელია, მე ამ ოჯახის წევრი ვარ.”მაშინ, როცა საქართველო მძიმე სოციალურ-ეკონომიკურ კრიზისში იყო და დასაქმებულთა უმეტესობა, საკუთარ საქმეს, ფაქტობრივად, ანაზღაურების გარეშე აკეთბდა, ომარ ლალიანცს თავისი საქმე არ მიუტოვებია. მიუხედავად იმისა, რომ სახლში ოთხი შვილი ჰყავდა და სხვების მსგავსად, პურის რიგში დგომა მასაც საათობით უწევდა, სტადიონის ბალახის საფარს შეძლებისდაგვარად პატრონობდა და ყოველი თამაშის წინ ყველა ხაზს ზედმიწევნით ავლებდა. გარდა ამისა, დახაზვამდე ხშირად თავადვე უწევდა ბალახის გათიბვა და მორწყვაც.
“ზუსტად აღარ მახსოვს, რომელ წელს, ან რომელ მატჩზე, მაგრამ იყო შემთხვევა, როცა 11-მეტრიანის ნიშნულის დახაზვისას შევცდი. როცა მსაჯმა გადაამოწმა, აღმოჩნდა, რომ 11-ის ნაცვლად, 12 მეტრი იყო მონიშვნიდან კარამდე. ეს ხარვეზი ადვილად აღმოიფხვრა, მითუმეტეს, მაშინ „დილას“ ფეხბურთელმა დანიშნული პენალტი სწორედ 12 მეტრიდან გაიტანა. გასახსენებელი ძალიან ბევრი მაქვს, განსაკუთრებით იმ პერიოდიდან, ასე ვთქვათ, ძველი დროიდან, როცა მეც უფრო ახალგაზრდა ვიყავი. მთავარი, რაც მინდა გითხრათ ისაა, რომ მიყვარს ჩემი საქმე და სანამ ჯანმრთლობა ამის შესაძლებლობას მომცემს, ვიმუშავებ იქ, სადაც ფაქტობრივად, ოჯახზე მეტი დრო მაქვს გატარებული.”არ იფიქროთ, რომ ომარ ლალიანცს სტადიონის მოწესრიგება მხოლოდ შიდა ტურნირებზე, ან შიდა ჩემპიონატებზე უწევს. 2017 წელს გამართული ევროპის ახალგაზრდული ჩემპიონატის დროს, თეგიზ ბურჯანაძის სახელობის გორის ცენტრალური სტადიონის მთავარი მხაზველი ასევე ომარ ლალიანცი გახლდათ. იმედს ვიტოვებთ, რომ ჩვენი სტადიონი კიდევ არაერთი საერთაშორისო ტურნირის მასპინძელი იქნება, სადაც სტადიონზე თამაშის დაწყებამდე მთავარ შტრიხებს სწორედ ომარ ლალიანცი გაავლებს.
მოგეხსენებათ, დღეს 18:00 საათზე, თეგიზ ბურჯანაძის სახელობის გორის ცენტრალურ სტადიონზე ეროვნული ლიგის მატჩი გაიმართება, სადაც გორის „დილა“ ბათუმის „დინამოს“ უმასპინძლებს. მატჩის დაწყებამდე, დაგეგმილია ომარ ლალიანცის დაჯილდოების ღონისძიება, სადაც სტადიონის მთავარ მხაზველს სიმბოლური საჩუქრები გადაეცემა. 
